Aaj jab baarish ki boonden fir sheeshe pe aa giri
To beete hue kal me kahin, ek naav koi chal padi
Wo naav be'shak kagaz ki thi, par sapne sacche sehti thi
Aur mere bachpan ke man ko, behalane ke liye behti thi
Aaj haath me kagaz bhi hai, aur bahar padi hai baarish bhi
Aaj bachpan ka man hai, aur naav chalane ki khaahish bhi
Par beech me ek sheesha hai, jo ise mujh tak aane na de
Aur mere bhi kuch bandhan hai, jo mujhe is tak jaane na de
To bas, kosta hoon ise, ki kapde saare bhigayegi
Aur fir raston pe Car'on ki katare lambi ho jayengi
Aaj fir bachpan ke man ko, maine Daant DapaT bitha diya
Aur in baarish ki boondon ko, sheeshe se hi vida kiya
No comments:
Post a Comment